Jagi 2023 čađahuvvojedje 55 700 giddodatgávppi. Dat lea 11,6 proseantta unnit go jagi 2022. Gávppiide geavahuvvon ruhtamearri njiejai 25,6 proseantta 7,4 miljárda euroi ovddit jagi 9,9 miljárda euros. Ásodagaide ja luopmogiddodagaide geavahuvvon ruhtamearri njiejai 21 proseantta, muhto dan sajis eanan- ja meahccedoallodáluid skáhppoma ruhtamearri njiejai dušše 8,3 proseantta.
– Jahki 2023 lei oalle hástaleaddji ásodat- ja giddodatmárkaniin. Álgojagi áigge gávppašeapmi lei oalle njoahci, ja geasi uhca virkkosmuvvama maŋŋá mearit njidje vuot álgočavčča. Jagi maŋimuš kvartálas gávppiid mearit jukse goittotge ovddit jagi dási. Váriidsirdinvearu nuppástusaid mielde juovlamánus dahke mearkkašahtti olu eambbo gávppiid go ovddit jagi juovlamánus. Olles jagi gávpemearit ledje 1990-logu dásis. Goittotge giddodatgávppiide geavahuvvon ruhtameari njiedjan badjel njealjádasain jagi 2022 ektui lea mearkkašahtti, muitala giddodagaid gávpehadderegistaris vástideaddji registtarhoavda Saara Saari Eanamihtidanlágádusas.
Dieđut albmanit Eanamihtidanlágádusa giddodagaid gávpehaddestatistihkas, mii lea buohkaide rabas fierbmebálvalus. Dieđut beaiváduvvojit juohke mánotbaji Eanamihtidanlágádusa bajásdoallan giddodagaid gávpehadderegistaris, mii hápmašuvvá gávpenannejeaddjiid almmuhusaid vuođul.
Bearašdáluid haddedássi njiejai 11,8 proseantta jagi 2022 ektui
Bearašdállogávppiid mearri sajádatlávvaguovllus unnui mearkkašahtti olu jagi 2023, go ovddasteaddji gávppiid dahke 6 970. Mearit njidje 20,4 proseantta ovddit jagi ektui. Gávpemearit njidje álgojagi 2023, muhto jagi loahpageahčen maŋimuš kvartálas oidne gávpemeriid virkkosmuvvama. Haddedássi njiejai 11,8 proseantta. Bieđgguidássanguovlluin bearašdáluid gávpemearit njidje unnit,13,7 proseanttain, muhto haddedássi gahčai 16,8 proseantta. Gávpemeriid ja hattiid nuppástusain leat mearkkašahtti olu guvllolaš ja gielddaid gaskasaš erohusat.
Suoma divrasamos bearašdállogávpi dahkkui jagi 2023 Kauniainenis. Doppe dahke dušše golbma ovddasteaddji bearašdállogávppi ja daid mediánahaddi lei 980 000 euro. Espoos dahke lohkomearálaččat 18,2 proseantta unnit gávppiid go ovddit jagi ja jagi 2023 giddodatgávppiid mediánahaddi lei 514 500 euro. Mediánahaddi njiejai 11,3 proseantta ovddit jagi ektui. Helssegis bearašdállu mávssii diibmá gaskamearálaččat 438 000 € (-12,4 %), Vantaas 350 000 € (-7,7 %), Tamperes 275 000 € (-12,7 %), Turkus 251 000 € (4,6 %), Jyväskyläs 195 000 € (-7,1 %), Kuopios 159 500 € (-10,6 %), Oulus 210 000 € (-8,7 %) ja Roavvenjárggas 150 000 € (-9,1 %).
Eanamihtidanlágádusa gávpestatistihkka gokčá dušše iežas viessosadjái huksejuvvon giddodagaid, iige danin giddodat- dahje ásodatossosiid iige láigoviessosadjái huksejuvvon bearašdáluid.
Luopmogiddodagaid gávppit njidje 15,6 proseantta jagi 2022 ektui
Luopmogiddodagaid gávpi njoazui jo jagi 2022 mearkkašahtti olu, 27,8 proseantta. Gáddái rádjášuvvi huksejuvvon luopmogiddodagaid gávppiid mearit oppalaš- ja gáddesajádatlávvaguovlluin njidje ain jagi 2023 16,3 proseantta olles Suoma guovllus. Oppalaš- ja gáddesajádatlávvaguovlluid gáddái rádjášuvvi astoáiggi ásodagaid gaskahaddi njiejai proseantta ja lei 90 000 euro. Bieđgguidássanguovllu gáddái rádjášuvvi čuozáhagaid gávpemeriid nuppástus lei 6,1 proseantta ja gaskahaddi 70 000 euro. Ovddit jagi ektui dat lei 7,1 proseantta stuorát. Huksekeahtes luopmogiddodagaid gávpemearri njiejai 21,5 proseantta 1 112:ii.
Luopmogiddodagaid gávppis ledje mearkkašahtti erohusat guvllolaččat sihke gávpemeriin ja hattiin.
Bealdogávpi ealasmuvai erohussan nuppiin giddodatšlájain
Mannan jagi áigge dahke badjel 2 hektára dušše bealddu sisttisdoalli gávppiid buohkanassii sullii 720 stuhka. Dat lea 7 proseantta eambbo go jagi 2022. Eanemus gávppit dahkkojedje maŋimuš jagiid láhkái Mátta-Bađaeatnamis, oktiibuot 137. Doppe gávppiid mearri loktanii 8 proseantta.
Olles riikka bealdogávppiid mediánahaddi lei 8 500 euro hektáras. Gaskahaddi njiejai 4 proseantta ovddit jagi ektui. Nannán-Suomas bealdu lei divrasamos Varsinais-Suomas, gos mediánahaddi lei 12 200 €/ha. Ålánddas bealdoeanan lei vel divrasat, 16 900 €/ha. Lohkoárvu vuođđuduvvá vihtta gávpái maidda gulai dušše bealdu. Hálbbimussan bealddu sáhtii skáhppot Lappis, sullii 2 500 €/ha.
Meahccedállogávppiid mearri njiejai, muhto hattit loktanedje ain
Diibmá olles riikkas dahkkojedje sullii 4 050 ii-fulkkiid gaskasaš badjel 2 hektára gávppi maidda gulai dušše meahcci. Dat lea 10,4 proseantta unnit go ovddit jagi. Eanemus meahccegávppiid dahke mannan jagiid láhkái Davvi-Bađaeatnamis, oktiibuot 600. Doppe gávppiid mearri unnui 6,5 proseanttain jagi 2023 ovddit jagi 2022 ektui.
Go seassat gávpemeriid ovdáneami eanangottiid mielde gaskavuođas ovddit jahkái daid eanangottiid oasil, gos dahket badjel čuođi gávppi jahkásaččat, mearit lassánedje eanemusat Mátta-Bađaeatnamis (20,6 %), Mátta-Gárjilis (13 %) ja Pirkanmaas (9,5 %). Meahccedállogávppit geahppánedje garrasamosat Davvi-Gárjilis (35,5 %), Kainuus (26,5 %) ja Lappis (22,1 %). Dáid golbma máinnašuvvon eanangottis ruhtarájut leat árbevirolaččat leamaš aktiivvalaš oastit.
– Diimmá gávppiid mediánahaddi lei sullii 3 930 euro hektáras. Nominála meahcci gaskahaddi ii leat goassige ovdal leamaš ná allat Eanamihtidanlágádusas 1980-logus álgán giddodagaid gávpehaddedieđuid čoaggima áigge. Olles jagi oasil meahci haddi loktanii 8 proseantta jagi 2022 ektui. Diimmá gaskahatti lokte maiddái dat, ahte gávppiid gaskamearálaš muorrasaddjáivuohta lea leamaš vehá vuollel 2 proseantta alit go ovddit jagi. Oassi olles riikka gaskahatti alláneamis čilgejuvvo maid Suoma máttaoasi alit hattiiguin, go mátti oassi gávpemearis loktanii ovddit jagi 36 proseanttas 39 prosentii. Go seassat diimmá gávpehattiid, jagi maŋimuš kvartálas hattit njiedjagohte jo vehá, muitala mehcciid gávpestatistihka dutkan jođiheaddji áššedovdi Esa Ärölä Eanamihtidanlágádusas.
Meahcci lei divrasamos Varsinais-Suomas, gos mediánahaddi lei 6 200 euro hektáras. Uusimaas besse maid 6 000 euro gaskamearálaš hektárahaddái. Meahci oaččui hálbbimussan Lappis, gaskamearálaččat 1 400 euro hektáras. Gaskahaddi stuorui euromearálaččat ja prosentuálalaččat eanemus Kymenlaaksos sullii 800 €/ha ja masa 19 proseantta. Meahccehektára mediánahaddi unnui eanemus Kainuus, sullii 11 proseantta.
Teavsttas máinnašuvvon hattit leat nominálahattit ja gaskahattit mediánahattit.
Lassedieđut
Giddodatgávppiid statistihkkadieđuid birra
Registtarhoavda Saara Saari, 050 304 8391, ovdanamma.sohkanamma@maanmittauslaitos.fi
Jođiheaddji áššedovdi Esa Ärölä, 040 180 1301, ovdanamma.sohkanamma@maanmittauslaitos.fi
Ovttaskas giddodatgávppiid birra
Eanamihtidanlágádusa áššehasbálvalus, 029 530 1110 (vu-be 9-16:15)