Jagi 2019 váldojuvvui adnui lanjadatdiehtovuogádat, masa čohkkejuvvojit gulul dieđut oasuslanjadagaid, daid oamastusaid ja pántemiid birra. Báberhámát oasusgirjjiin leat luohpamin muttuid mielde jagi 2019 álggu rájes ja diehtu oasuslanjadaga oamasteaddjis dolvojuvvo Eanamihtidanlágádusa bajásdoallan lanjadatdiehtovuogádahkii.
Ođđa, 1.1.2019 maŋŋá vuođđuduvvon fitnodagat leat vuođđudeami rájes njuolgga lanjadatdiehtovuogádagas. Oasusgirjjit eai prentejuvvo, baicca dieđuid oasuslanjadagaid oamastusain, pántemiin ja ráddjehusain ožžot lanjadatdiehtovuogádagas.
Boares, ovdal 1.1.2019 vuođđuduvvon ásodatservviid sirdašuvvan lanjadatdiehtovuogádahkii dáhpáhuvvá guokte muttus. Vuos ásodatsearvvit galget sirdit oasuslogahallama lanjadatdiehtovuogádahkii (suomagillii). Easkka dán maŋŋá ovttaskas oasuslanjadaga oamastusa sáhttá registreret elektrovnnalaš vuogádahkii.
Lanjadatdiehtovuogádaga adnui váldin ii dagat njuolgga doaibmabijuid oasuslanjadaga oamasteaddjái. Ovttaskas oasusdoalli doaibmá nu mo ovdalge dan rádjái, go ásodatsearvi lea dahkan oasuslogahallama sirdima. Oamastanvuoigatvuođa duođašteapmi vuođđuduvvá ain báberhámát oasusgirjái ja oasusdoalli sáhttá geavahit oasusvuoigatvuođaid omd. ásodatsearvečoahkkimis nu mo dánge rádjái. Oasusgirji sáhttá ain leat loana dáhkádussan dahje muđui rájus báŋkkus.
Gos oainnát iežat ásodatsearvvi dili?
Go du ásodatsearvvi oasuslogahallan lea sirdojuvvon lanjadatdiehtovuogádahkii, ásodatsearvi almmuha das oasusdoalliide. Dieđu das, leago ásodatsearvi dahkan sirdima, oaččot maŋŋá ásodatsearvvis dahje hovdejeaddjis. Dieđu galgá merket maiddái hovdejeaddjisoahpamuššii. Maiddái Eanamihtidanlágádusas sáhttá jearrat ásodatsearvvi dili birra.
Oamastusa registreren
Oasuslogahallama sirdima maŋŋá sáhtát ohcat iežat oamastusa registrerema sihke fámohuhttit báberhámát oasusgirjját Eanamihtidanlágádusas.
Go du ásodatsearvvi oasuslogahallan lea sirdojuvvon lanjadatdiehtovuogádahkii, ásodatsearvi almmuha das oasusdoalliide. Oasuslogahallama sirdima galgá dahkat ovdal jagi 2023 loahpa.
Oamastusa registrerema ja báberhámát oasusgirjji fámohuhttima galgá ohcat logi jagi siste das, go ásodatsearvi lea sirdán oasuslogahallama lanjadatdiehtovuogádahkii. Oamastusa registreren lea bákkolaš dalle, go oasuslanjadaga oamasteaddji molsašuvvá vuosttas háve oasuslogahallama sirdima maŋŋá.
Loga lasi oamastusa registreremis
Go oamasteaddjivuohta vuođđuduvvá elektrovnnalaš oamasteaddjimerkemii, oasusdoallis ii leat šat dárbu seailluhit báberhámát oasusgirjji eaige das šat šatta golut mat leat vejolaččat leamaš. Seammás riska báberhámát oasusgirjji duššamis dahje láhppumis jávká.
Pántema ja ráddjehusa registreren
Pántema registrerema sáhttá ohcat easkka dalle, go lanjadagas lea elektrovnnalaš oamasteaddjimerken.
Hálddašanvuoigatvuođa ráddjehusa registrerema sáhttá ohcat jo dalle, go ásodatsearvi gullá lanjadatdiehtovuogádahkii, vaikko lanjadagas ii livččiige vel elektrovnnalaš oamasteaddjimerken.
Loga lasi lanjadaga geavaheamis loana dáhkádussan (suomagillii)
Loga lasi ráddjehusa registreremis (suomagillii)
Oktavuođadieđut lanjadatdiehtovuogádagas
Oasuslogahallama sirdima oktavuođas ásodatsearvi almmuha oasusdoalliid poastačujuhusa ja vejolaš šleađgapoastačujuhusa lanjadatdiehtovuogádahkii oasuslogahallama sihke ásodatsearvvi dieđiheami várás. Ásodatsearvi sáhttá geavahit lanjadatdiehtovuogádahkii almmuhuvvon oktavuođadieđuid ee. ásodatsearvečoahkkinbovdehusa doaimmahančujuhussan. Oasusdoalli galgá ieš almmuhit Eanamihtidanlágádusa áššehasbálvalussii vejolaš nuppástusaid oktavuođadieđuide skoviin Almmuhus oasusdoalli oktavuođadieđuin ásodatsearvvi oasuslogahallamii (suomagillii).
Go ozat elektrovnnalaš oamastusa registrerema, dus lea vejolašvuohta almmuhit lanjadatdiehtovuogádahkii oktavuođadieđuid (šleađgapoastačujuhus ja poastačujuhus) oasuslogahallama sihke ásodatsearvvi várás. Juos it almmut sierra čujuhusa, poastačujuhussan geavahuvvo Álbmotdiehtovuogádagas (Väestötietojärjestelmä, VTJ) dahje Fitnodat- ja searvvušdiehtovuogádagas (Yritys- ja yhteisötietojärjestelmä, YTJ) leahkki čujuhus.
Lanjadaga vuovdin
Juos don leat vuovdimin iežat oamastan oasuslanjadaga, oahpásmuva sierra vuovdi muitolistui (suomagillii).