Eanamihtidanlágádus doallá eanadatdiehtovuođu áigedásis áibmogovvemiid vuođul. Eanamihtidanlágádus ja dan vuolit lágideaddjit áibmogovvejedje cuoŋománu ja čakčamánu gaskkas Suoma viidodagas sullii ovtta goalmmádasa ja láserskánnejedje sullii guđadasa.
– Gollan badji lei váddásut go dábálaš. Min iežamet girdinmašiinna mohtor cuovkanii ja balvadálkkit este áibmogovvema menddo máŋgga beaivve. Mii guhkideimmet govvenbaji ja juvssaimet dan ánssus 90 proseantta min mihttomearreviidodagain, muitala kártáhoavda Juha Kareinen Eanamihtidanlágádusas.
Dillekártábálvalusas oaidná, maid guovlluid áibmogovvejedje ja maid láserskánnejedje dán jagi. Bálvalusas ruoksadin nappo áibmogovvekeahttá báhce earret eará Pelkosenniemi, Salla, Lattuna, Riisitunturi sihke Suomussalmi. Suomussalmi, Salla ja Gilbbešjávri báhce láserskánnekeahttá. Lassin bálvalusas oaidná Álbmotlaš láserskánnen- ja áibmogovvenprográmmaid boahttevaš jagiid buvttadanguovlluid.
Áibmogovvema ja láserskánnema eanadatbarggut bohciidahte giđđat ságastallama medias
Giđđat almmustuvve ođđasat, ahte Eanamihtidanlágádus geavaha oastobálvalussan olgoriikkalaš fitnodagaid, maid bargui gullet maiddái eanadatgalledeamit materiála kvalitehta sihkkarastima várás. Eanamihtidanlágádusas lea okta iežas girdinmašiidna, áibmogovvenkámera ja láserskánnenbierggas, muhto daid lassin Eanamihtidanlágádus skáhppo stuorámus oasi áibmogovven- ja láserskánnenbuvttadeamis fitnodagain.
– Mii lágideimmet rámmaordnestallamiid bokte fálaldatgilvvu viđa fitnodaga gaskkas áibmogovven- ja láserskánnenmateriálaid dárbbuide. Skáhppoma árvu lei stuorát go skáhpponlágas meroštallon šielbmáárvu, nu ahte fálaldatgilvu lei EU:a viidosaš. Suopmelaš oamastusas ii leat dál oktage om. bálvalusaid buvttadeaddji fitnodat, jođiheaddji Heli Laaksonen Eanamihtidanlágádusas muitala.
Áibmogovven- ja láserskánnenbaji ovdal barge eanadatbargguid maid dán geasi birra Suoma. Eanadatgalledemiid dahke váldoáššis geainnuid guoras eaige šiljuin.
Áibmogovat fidnemis rabas materiálan
Varas dán geasi áibmogovat gávdnojit jo buot Eanamihtidanlágádusa bálvalusain. Maŋimušge áibmogovaid besset almmustahttit golggotmánu áigge. Áibmogovat leat fidnemis rabas materiálan. Láserskánnenmateriálat gerget čavčča áigge ja maŋimusge guovlluid oažžut materiálan geavahan láhkái maŋimustá skábmamánu loahpas.
Láserskánnenmateriálain lea fidnemis hárvveduvvon veršuvdna rabas dáhtan. Materiála lea álgoálgosaš čuokkessuohkatvuođas almmolaš, muhto gáibida geavahanlobi dohkkeheami ja geavaheaddji identifiserema.
Loga lasi láserskánnenmateriálaid skáhppoma birra.
Lassedieđut
Kártáhoavda Juha Kareinen, 040 569 7951 ovdanamma.sohkanamma@maanmittauslaitos.fi